XƏBƏRLƏR

"Günay Sığorta"nın əməkdaşları BMU-nun tələbələrilə görüşüb

Bakı Mühəndislik Universitetinin (BMU) Müəssisələrlə əlaqələr və karyera departamenti və Təcrübə şöbəsinin təşkilatçılığı ilə “Günay Sığorta” ASC-nin əməkdaşlarıyla görüş keçirilib.
BMU-nun İqtisadiyyat və idarəetmə fakültəsinin IV kurs tələbələri üçün təşkil edilən görüşün əsas məqsədi tələbələrə gələcək karyeralarını qurmaqda məsləhətlər vermək olub.
Görüşdə sığorta sahəsinin Azərbaycanda yeni və inkişafda olan aktiv sahə olduğu vurğulanıb, həmçinin sığorta şirkətində olan vakansiyalar haqqında məlumat verilib. Sığorta şirkətinə kadr seçimində və müsahibə mərhələsində ali təhsil və dil biliyi ilə yanaşı, təcrübəyə də üstünlük verildiyi diqqətə çatdırılıb. Şirkətdə məsul aktuari sahəsinə tələbatın daha çox olduğu bildirilib. Aktuari sahəsində riyazi biliklərin mühüm əhəmiyyət kəsb edildiyi, daxili audit xidmətində analizetmə və düzgün araşdırma aparmaq qabiliyyətinin vacibliyi qeyd olunub.
Şirkətin əməkdaşları (İnsan resursları və katiblik şöbəsinin müdiri Kəmalə Əliyeva və Marketinq və ictimaiyyətlə əlaqələr şöbəsinin müdiri Səidə Fətullazadə) sığorta fəaliyyətində peşəkar kadrların yetişdirilməsində və təcrübə qazanmasında maraqlı olduqlarını bildiriblər. Onlar tələbələrin bu prosesdə iştirak etməsi və təcrübə qazanması üçün şirkətin elan etdiyi “Tələbə Təcrübə Proqramı” haqqında ətraflı məlumat veriblər. Belə ki, sığorta şirkətində karyerasını qurmaq istəyən və bu sahədə biliklər əldə etmək istəyən tələbələr noyabrın ayının 30-na kimi office@gunaysigorta.az elektron poçtuna öz CV-lərini göndərə bilərlər. Mövzu (subject) hissəsində isə tələbələr universitetin və təcrübə keçmək istədikləri şöbənin adını qeyd etməlidirlər. Təcrübə proqramının sonunda uğur qazanmış şəxslərə şirkət tərəfindən iş təklif olunacaq.
Sonda tələbələri maraqlandıran suallar cavablandırılıb.